മാളയിൽ ബസ്സും ഓട്ടോറിക്ഷയും കൂട്ടിയിടിച്ച് ഓട്ടോ ഡ്രൈവർ മരിച്ചു. നാല് പേർക്ക് പരിക്കേറ്റു. മാള പരനാട്ടുകുന്ന് സ്വദേശി മുഹമ്മദ്‌ അസ്ഖാൻ (70) ആണ് മരിച്ചത്. മാള അന്നമട റോഡിൽ രാത്രി ഏഴരയോടെയായിരുന്നു അപകടം. മാള ഭാഗത്തേക്ക്‌ വരികയായിരുന്ന സ്വകാര്യ ബസും ആലുവ റെയിൽവേ സ്റ്റേഷനിലേക്ക് പോകുകയായിരുന്ന ഓട്ടോയും കൂട്ടിയിടിക്കുകയായിരുന്നു.
അപകടത്തെ തുടർന്ന് നിയന്ത്രണം വിട്ട ബസ് ഇലക്ട്രിക് പോസ്റ്റും ഇടിച്ചു തകർത്തു. മാളയിലെ ചുമട്ട് തൊഴിലാളിയായിരുന്ന മുഹമ്മദ്‌ അസ്ഖാൻ പിന്നീട് ഓട്ടോറിക്ഷ വാങ്ങി ഡ്രൈവറായി ജോലി ചെയ്ത് വരുകയായിരുന്നു. പരിക്കേറ്റ ഓട്ടോറിക്ഷ യാത്രക്കാരായ മറ്റു നാലുപേരെ ആശുപത്രിയിൽ പ്രവേശിപ്പിച്ചു.