രണ്ടു കോടി രൂപ വിലവരുന്ന ലഹരി മരുന്ന് പിടികൂടിയ സംഭവത്തില് 24കാരി അറസ്റ്റില്. ആലപ്പുഴ സ്വദേശി പുന്നപ്ര പാലിയത്തറ ഹൗസില് ജുമിയാണ് പിടിയിലായത്. ബെംഗളരൂവില് നിന്നാണ് അന്വേഷണസംഘം ഇവരെ പിടികൂടിയത്.
വാടകവീട് കേന്ദ്രീകരിച്ച് ലഹരിക്കച്ചവടം നടത്തിയിരുന്ന സംഘത്തെ പിടികൂടിയതിന് പിന്നാലെയാണ് ലഹരി കടത്ത് സംഘത്തില് ഉണ്ടായിരുന്നു ജുമിയെ പിടികൂടിയത്. ബെംഗളൂരുവില്നിന്ന് എംഡിഎംഎ കോഴിക്കോട്ടേക്ക് കൊണ്ടുവന്നതില് കടത്തുകാരിയായി പ്രവര്ത്തിച്ചത് ജുമിയയാണെന്നും പൊലീസ് പറഞ്ഞു.
മേയ് 19-നായിരുന്നു കേസിനാസ്പദമായ സംഭവം. പുതിയങ്ങാടി എടയ്ക്കല് ഭാഗത്തെ വാടകവീട് കേന്ദ്രീകരിച്ച് ലഹരിക്കച്ചവടം നടത്തുന്നുണ്ടെന്ന വിവരത്തിന്റെ അടിസ്ഥാനത്തില് വെള്ളയില് പൊലീസും ഡാന്സാഫും നടത്തിയ പരിശോധനയില് വീട്ടില്നിന്ന് രണ്ടുകോടിയിലധികം വിലവരുന്ന മയക്കുമരുന്ന് പിടികൂടിയിരുന്നു. പൊലീസ് പരിശോധനയ്ക്കെത്തിയപ്പോള് വീട്ടിലുണ്ടായിരുന്ന രണ്ടുപേര് ഓടിരക്ഷപ്പെട്ടു.
ഡെപ്യൂട്ടി പോലീസ് കമ്മിഷണര് അനുജ് പലിവാളിന്റെ നേതൃത്വത്തില് പ്രത്യേക അന്വേഷണസംഘം നടത്തിയ ഊര്ജിത അന്വേഷണത്തില് ആദ്യപ്രതി നിലമ്പൂര് സ്വദേശി ഷൈന് ഷാജിയെ ബെംഗളൂരുവില്നിന്നും രണ്ടാംപ്രതി പെരുവണ്ണാമൂഴി സ്വദേശി ആല്ബിന് സെബാസ്റ്റ്യനെ കുമളിയില്നിന്നും പിടികൂടിയിരുന്നു.
ഷൈന് ഷാജിയെ പൊലീസ് കസ്റ്റഡിയില് വാങ്ങി ചോദ്യംചെയ്തതില് ബെംഗളൂരുവില്നിന്ന് ഷൈനിനോടൊപ്പം എംഡിഎംഎ കോഴിക്കോട്ടേക്ക് കൊണ്ടുവന്നതില് കടത്തുകാരിയായി പ്രവര്ത്തിച്ചത് ജുമിയാണെന്ന് മനസ്സിലായി. കേസിലെ രണ്ടുപ്രതികളെ പിടികൂടിയപ്പോള് ജുമി ഒളിവില്പ്പോയി ബെംഗളൂരുവില് താമസിക്കുകയായിരുന്നു