തൃശ്ശൂർ : പെരിങ്ങാവിൽ ബ്രൗൺ ഷുഗറും കഞ്ചാവും വിൽപ്പന നടത്തിയ ഇതര സംസ്ഥാന തൊഴിലാളിയെ തൃശ്ശൂർ സിറ്റി ലഹരി വിരുദ്ധ സ്ക്വാഡും വിയ്യൂർ പോലീസും ചേർന്ന് അറസ്റ്റ് ചെയ്തു. പെരിങ്ങാവ് ഗാന്ധി നഗറിൽനിന്ന് അസം സ്വദേശിയായ മുക്സിദുൽ ആലോം (26) ആണ് പിടിയിലായത്. സിറ്റി പോലീസ് കമ്മിഷണറുടെ കീഴിലുള്ള ലഹരിവിരുദ്ധ സ്ക്വാഡും വിയ്യൂർ പോലീസും ചേർന്നാണ് ഇയാളെ അറസ്റ്റുചെയ്തത്.
കഴിഞ്ഞദിവസം മറ്റൊരു ആസാം സ്വദേശിയെ ഇളംതുരുത്തിയിൽ ബ്രൗൺ ഷുഗറുമായി ലഹരിവിരുദ്ധ സ്ക്വാഡ് പിടികൂടിയിരുന്നു. വിയ്യൂർ എസ്.ഐ. കെ. വിവേക് നാരായണൻ, ലഹരി വിരുദ്ധ സ്ക്വാഡിലെ എസ്.ഐ.മാരായ എൻ.ജി. സുവ്രതകുമാർ, കെ. ഗോപാലകൃഷ്ണൻ, പി. മോഹൻ കുമാർ എന്നിവരടങ്ങിയ സംഘമാണ് പിടികൂടിയത്.