കൊച്ചി : സ്പായിൽ കത്തികാട്ടി ആറുലക്ഷം രൂപ വിലവരുന്ന സാധനങ്ങൾ കവർച്ചചെയ്ത നാലംഗ സംഘം അറസ്റ്റിൽ. തൃശ്ശൂർ സ്വദേശികളായ ടി.വി. ആകാശ് (30), എ.വി. രാഗേഷ് (39), സിയാദ് (27), പി.വി. നിഖിൽ (30) എന്നിവരാണ് എറണാകുളം നോർത്ത് പോലീസിന്‍റെ പിടിയിലായത്.
വ്യാഴാഴ്ച രാത്രി 11.30 നായിരുന്നു സംഭവം. പുല്ലേപ്പടിയിൽ പ്രവർത്തിക്കുന്ന സ്പായിൽ കാളിങ് ബെൽമുഴുക്കുന്നതുകേട്ട് ഡോർ തുറന്ന സ്പാ ഉടമയെ അക്രമികൾ ഇരുമ്പുവടികൊണ്ട് തലയ്ക്ക് അടിക്കുകയായിരുന്നു. ബഹളം കേട്ട് അവിടേക്ക് ഓടിയെത്തിയ വനിതാ ജീവനക്കാരിയുടെ കഴുത്തിൽ കത്തിവെച്ച് ഭീഷണിപ്പെടുത്തുകയും അപമര്യാദയായി പെരുമാറുകയും ചെയ്തു.
ഫോൺ, പണം, ഐ പാഡ്, ലാപ്ടോപ്പ്, സ്മാർട്ട് വാച്ച്, സ്വർണാഭരണങ്ങൾ എന്നിവ അക്രമികൾ കൈക്കലാക്കി. പരാതിക്കാരന്റെ സുഹൃത്തിന്റ ഉടമസ്ഥതയിൽ ഉള്ള കാർ തട്ടിയെടുത്താണ് പ്രതികൾ സ്ഥലംവിട്ടത്.